कोरोना औषध: होमिओपॅथीने कोरोना बरा होऊ शकतो का? अर्सेनिक अल्बम 30 काय आहे? #सोपीगोष्ट 86


कोरोनाच्या केसेसची संख्या राज्यात आणि देशात वाढत असताना होमिओपॅथीचं एक औषध खूप चर्चेत आलं असेल. त्या औषधाचं नाव आहे ‘अर्सेनिक अल्बम.’

या औषधाची चर्चा सध्या सोशल मीडियावर होत आहे. अनेकांना वाटत आहे की हे औषध कोरोनासारख्या आजारावर एक महत्त्वाचं शस्त्र होऊ शकतं.

काही लोक या औषधाला ‘मिरॅकल ड्रग’ म्हणत आहेत तर काही लोक म्हणत आहेत की होमिओपॅथीचा परिणाम होण्यासाठी वेळ लागतो. तेव्हा कोरोनासारखा आजारावर हे औषध कितपत लागू होईल अशी शंका आहे.

आपण आजच्या सोपी गोष्टमध्ये हेच पाहणार आहोत की अर्सेनिक अल्बम काय आहे? होमिओपॅथीकडे कोरोनाचा उपचार आहे का? होमिओपॅथीबद्दल नेमका वाद काय आहे?

निर्मिती – तुषार कुलकर्णी

सादरीकरण – विनायक गायकवाड

एडिटिंग – निलेश भोसले

हेही पाहिलंत का?



Source link

कोरोना होमिओपॅथी उपचार : 'अर्सेनिक अल्बम 30'च्या गोळ्या खरंच किती गुणकारी?


औषध

Image copyright
Getty Images

होमिओपॅथीच्या गोळ्या म्हटलं की अनेकांच्या तोंडाला पाणी सुटतं. कारण या गोळ्या बाकीच्या औषधांसारख्या कडू नसतात. त्या गोड असल्यामुळे सहसा होमिओपॅथीच्या गोळ्यांना कुणाची ना नसते.

कोरोनाच्या केसेसची संख्या राज्यात आणि देशात वाढत असताना होमिओपॅथीचं एक औषध खूप चर्चेत आलंय. त्याचं नाव आहे ‘अर्सेनिक अल्बम 30’. अनेकांना वाटतंय की, हे औषध कोरोनाविरोधात एक महत्त्वाचं शस्त्र ठरू शकतं.

काहीजण या औषधाला ‘मिरॅकल ड्रग’ म्हणतायत तर काहींच्या मते याबाबत अजून कुठलाही ठोस पुरावा मिळालेला नाहीये. म्हणूनच कोरोनासारख्या आजारावर आर्सेनिक अल्बम 30 कितपत उपयोगी ठरू शकतं, याबाबत शंकाच आहे.

पण हे औषध आहे तरी काय? सध्या ते इतकं चर्चेत का आलंय? त्यांनी खरंच कोरोनापासून बचाव होऊ शकतो का? जगात कोरोनाची लस तयार झाली नसताना होमिओपॅथीकडे कोरोनाचा उपचार आहे का?

भारत सरकारचं AYUSH मंत्रालय म्हणजेच आयुर्वेदिक, युनानी, सिद्ध आणि होमिओपॅथी प्रॅक्टिशनर्ससाठी असलेल्या मंत्रालयाने 6 मार्चला एक सर्क्युलर काढलं होतं. त्यात त्यांनी म्हटलं होतं की, कोव्हिड-19 चा संसर्ग पसरण्याची चिन्हं आहेत, पण घाबरण्याचं काहीही कारण नाही.

आयुष हे वैद्यकीय क्षेत्राशी निगडित आहे आणि या उपचार पद्धती रुग्णांच्या सर्वांगीण आरोग्याचा विकास व्हावा, या तत्त्वावर आधारित आहेत. त्यामुळे रुग्णाची प्रतिकार क्षमता वाढवण्यासाठी जे शक्य होईल ते करावं.

हे करत असताना मेडिकल रिसर्च काउन्सिल आणि केंद्रीय आरोग्य मंत्रालयाने दिलेल्या सूचनांचं पालन करावं, असंही आयुष मंत्रालयानं म्हटलं होतं. याच सर्क्युलरमध्ये अर्सेनिक अल्बम 30 या औषधाचा उल्लेख करण्यात आलाय. हे औषध रुग्णाची रोगप्रतिकारक क्षमता वाढवण्यास मदत करतं, असं यात म्हटलं गेलंय.

जेव्हा हे सर्क्युलर आलं त्यावेळी हे औषध फारसं चर्चेत आलं नाही. पण गेल्या काही दिवसांमध्ये या औषधाबाबतच्या चर्चेनं जोर धरलाय. त्याचं एक कारण म्हणजे रत्नागिरीचे आमदार आणि उच्च शिक्षण मंत्री उदय सामंत यांनी म्हटलं की, त्यांच्या मतदारसंघातील तब्बल साडे चार लाख कुटुंबीयांना अर्सेनिक अल्बम 30च्या गोळ्यांचं वाटप केलं जाईल.

राज्याच्या कोव्हिड टास्क फोर्सचे प्रमुख डॉ. तात्याराव लहाने यांच्याशी आपली याबाबत चर्चा झालीये आणि त्यांनी हे औषध रोगप्रतिकारक क्षमता वाढवतं, असं आपल्याला सांगितल्याचं उदय सामंत यांनी म्हटलं होतं. इतकंच नाही तर मुंबईच्या काही नगरसेवकांनीही त्यांच्या विभागात हजारो गोळ्यांचं वाटप केलं होतं. त्यानंतर ‘अर्सेनिक अल्बम 30’ नेमकं काय आहे? आणि कोव्हिडविरोधातील लढ्यात रोगप्रतिकारक क्षमतेची नेमकी काय भूमिका आहे, यावर चर्चा होतेय.

अर्सेनिक अल्बम 30 कसं काम करतं?

आयुषने प्रसिद्ध केलेल्या सर्क्युलरमध्ये म्हटलं आहे की, अर्सेनिक अल्बम 30 चा डोस तीन दिवस उपाशी पोटी घ्यावा. त्यानंतर पुन्हा महिन्याभराने हा डोस घ्यावा. जोपर्यंत कोरोनाचा संसर्ग समुदायामध्ये आहे तोपर्यंत हे औषध घेत रहावं. या औषधावर संशोधन झालं असून ते रोगप्रतिकारक क्षमता वाढवतं, असं आयुष मंत्रालयाने म्हटलं आहे.

आत्तापर्यंत समोर आलेल्या गोष्टींनुसार कोरोना व्हायरस आपल्या रोगप्रतिकारक क्षमतेवर हल्ला करत अलल्याचं दिसून आलंय. त्यामुळे जर आपली रोगप्रतिकारक क्षमता वाढली तर ते आपल्यासाठी फायद्याचं ठरू शकतं.

Image copyright
Getty Images

हे औषध नेमकं कसं काम करतं हे जाणून घेण्यासाठी आम्ही मुंबईतील होमिओपॅथिक प्रॅक्टिशनर डॉ. जयेश वैशंपायन यांच्याशी संपर्क साधला. त्यांच्या मते, “होमिओपॅथी जीनस एपिडेमिकस या सिद्धांतावर अवलंबून आहे. म्हणजे त्या रुग्णाची पूर्ण हिस्टरी काढून त्याला असलेल्या आजारांच्या लक्षणाच्या आधारावर काही औषधं दिली जातात. काही औषधं अत्यंत महत्त्वपूर्ण असतात. त्यांना ‘काँस्टिट्यूशनल मेडिसीन’ म्हणतात. अर्सेनिक अल्बम 30 हेही एक काँस्टिट्यूशनल मेडिसीन आहे.”

ज्या रुग्णांना सर्दी, खोकला, ताप, जीव जाण्याची भीती वाटणं अशी लक्षणं आहेत त्यांना हे औषध दिलं जातं. कोव्हिड-19 मध्येही अशीच लक्षणं आहेत. त्यामुळेच हे औषध कोव्हिडच्या रुग्णांना दिलं जाऊ शकतं, असंही वैशंपायन सांगतात.

पण मग अर्सेनिक अल्बम 30 मुळे रोगप्रतिकारक क्षमता कशी वाढते? तज्ज्ञांच्या मते रुग्णाची रोगप्रतिकारक क्षमता कशी वाढवता येईल, यावरच होमिओपॅथीचा आधार आहे. जसं अॅलोपॅथीमध्ये एखाद्या स्पेसिफिक अवयवावर थेट परिणाम व्हावा म्हणून औषध दिली जातं.

उदाहरणार्थ – शरीरातली इन्सुलिनची लेव्हल वाढावी म्हणून अशी औषधी दिली जातात जी थेट पॅंक्रियावरच परिणाम करतात. पण तसं होमिओपॅथीमध्ये नसतं.

जे औषध इथे दिलं जातं ते शरीरातली रोगप्रतिकारक क्षमता बळकट करतं आणि इतर अनावश्यक तत्त्वांचं निर्मूलन करत असतं. त्यामुळे आजाराचं नाव काहीही जरी असलं तरी लक्षणांच्या आधारावर होमिओपॅथीची ट्रीटमेंट दिली जाऊ शकते. महाराष्ट्र सरकारने कोव्हिड विरोधात लढण्यासाठी एक टास्कफोर्स तयार केलीये. यात आयुर्वेदिक, युनानी, सिद्ध आणि होमिओपॅथीच्या तज्ज्ञ आणि अनुभवी डॉक्टरांचा समावेश आहे.

पण मुळात होमिओपॅथी ही उपचार पद्धती आहे तरी काय? तीचा शोध कोणी लावला? हेही जाणून घेणं तितकंच महत्त्वाचं आहे.

होमिओपॅथीचे जनक कोण?

200 वर्षांपूर्वी जर्मनीमध्ये सॅम्युएल हॅनमन नावाच्या एका डॉक्टरने होमिओपॅथीचा शोध लावला. वैद्यकीय शिक्षण घेतल्यावर त्यांना जाणवलं की आपण जे उपचार करत आहोत ती पद्धत कठोर आणि अपरिणामकारक आहे. या गोष्टीमुळे त्यांनी आपली प्रॅक्टिस सोडून दिली आणि ते भाषांतरकार बनले.

पुढे पुस्तकं वाचता वाचता त्यांच्या हातात एक पुस्तक लागलं त्यात लिहिलं होतं की, झाडाच्या सालीपासून तयार करण्यात आलेल्या क्विनोन या औषधाने मलेरिया बरा होतो.

Image copyright
EPA

या गोष्टीचं त्यांना कुतूहल वाटलं आणि ते यावर विचार करायला लागले. सॅम्युअल यांनी स्वतःवरच प्रयोग करायला सुरुवात केली. त्यांच्या हे लक्षात आलं की, जेव्हा ते क्विनोनचा डोस घेत होते तेव्हा त्यांच्या शरीरात मलेरियाची लक्षणं दिसू लागली होती.

मग यातूनच त्यांनी एक सिद्धांत मांडला आणि या विचारावरच होमिओपॅथी आज उभी आहे. या सिद्धांताला होमिओपॅथीमध्ये ‘like cures like’ असं म्हणतात. याचा अर्थ आहे काट्याने काटा काढणं. म्हणजे काय, तर ज्या तत्त्वापासून किंवा पदार्थापासून आजार तयार होतो, तेच तत्त्व औषध म्हणून वापरायचं.

पण जर होमिओपॅथीची औषधं खूप मोठ्या प्रमाणात घेतली तर ती जीवघेणीसुद्धा ठरू शकतात असंही यपूर्वी तज्ज्ञांना आढळून आलंय आणि म्हणूनच औषध देण्यापूर्वी ते औषध डायलूट केलं जातं. यावरूनच होमिओपॅथी आणि अलोपॅथीदरम्यान वाद आहेत. कारण तज्ज्ञांच्या मते जर होमिओपॅथीचं औषध इतकं डायल्यूट केलं गेलं तर मग त्यात मूळ गोष्टी फारच कमी प्रमाणात राहातात.

प्लसिबो इफेक्ट म्हणजे काय?

पण या बरं होण्यामागे औषधांपेक्षा त्या रुग्णाच्या इच्छाशक्तीमुळेच आजार बरा झाल्याचं काही संशोधक म्हणतात. याला ‘प्लसिबो इफेक्ट’ म्हणतात. ‘प्लासिबो इफेक्ट’ म्हणजे त्या औषधामध्ये नेमका काय कंटेट आहे, हे माहीत नसतानाही तो रुग्ण ते औषध घेत राहतो. या औषधाने आपण बरे होऊ, असं त्या व्यक्तीला वाटत असतं. पण खरं तर त्या गोळ्यांमध्ये काहीच केमिकल नसतं.

‘प्लासिबो इफेक्ट’ या संकल्पनेबद्दल बरंच काही लिहिलं गेलंय. काही जणांना वाटतं की, पूर्ण होमिओपॅथी याच सिद्धांतावर अवलंबून आहे. पण तसं असतं तर लहान मुलं का बरी झाली असती? त्यांना तर औषध म्हणजे काय आणि ते घेतल्यावर आपण बरे होऊ हेसुद्धा माहीत नसतं, असाही युक्तिवाद केला जातो.

पण होमिओपॅथी आणि अर्सेनिक अल्बम 30 बद्दल बोलताना हेसुद्धा स्पष्ट करणं तितकंच गरजेचं आहे की, या दोन्ही गोष्टींमुळे कोरोनापासून पूर्णपणे बचाव होऊ शकतं हे मात्र सिद्ध झालेलं नाही. पण जिथे कोरोनाची लस आलेली नाही आणि आपल्या रोगप्रतिकारक क्षमतेवर आपण सगळेच जण अवलंबून आहोत तिथे अर्सेनिक अल्बम 30 आणि होमिओपॅथीमुळे काही जणांना आधारही मिळतोय.

पण तुम्हाला तुमची रोगप्रतिकारक शक्ती वाढवायची असेल तर तुमच्या आहारात फळं आणि भाज्यांचा समावेश अधिक करा. व्यायाम, फिरायला जाणं या गोष्टी नियमित करा. संतुलित आहार घ्या, पुरेशी झोप घ्या आणि मुख्य म्हणजे ताण-तणाव घेऊ नका. या गोष्टी जर केल्या तर तुमची रोग प्रतिकारक क्षमता नैसर्गिकरीत्या वाढू शकते.

हेही वाचलंत का?

(बीबीसी मराठीचे सर्व अपडेट्स मिळवण्यासाठी तुम्ही आम्हाला फेसबुक, इन्स्टाग्राम, यूट्यूब, ट्विटर वर फॉलो करू शकता.बीबीसी विश्वरोज संध्याकाळी 7 वाजता JioTV अॅप आणि यूट्यूबवर नक्की पाहा.)



Source link

HCQ : डोनाल्ड ट्रंप घेत असलेल्या हायड्रॉक्सीक्लोरोक्वीन औषधावरून WHOने युटर्न घेतलाय का?


कोरोना, औषध

Image copyright
Getty Images

प्रतिमा मथळा

हायड्रॉक्सीक्लोरोक्वीन

जागतिक आरोग्य संघटनेने कोरोना रुग्णांसाठी हायड्रॉक्सीक्लोरोक्वीन औषधाच्या वापरासंदर्भात क्लिनिकल ट्रायलला काही काळासाठी तत्त्वासाठी स्थगिती दिली आहे.

जागतिक आरोग्य संघटनेचे संचालक डॉ. टेड्रॉस एडहॅनम गेबेरियेसुस सोमवारी म्हणाले की, डेटा सेफ्टी मॉनिटरिंग हायड्रॉक्सीक्लोरोक्वीन औषधाच्या सुरक्षित उपयोगाबाबत अभ्यास करतील. जगभरात या औषधाच्या वापरासंदर्भात सुरू असलेल्या प्रयोगांचंही विश्लेषण करण्यात येईल.

हायड्रॉक्सीक्लोरोक्वीन आणि क्लोरोक्वीन या औषधांचा उपयोग मलेरिया तसंच लुपस या ऑटोइम्यून आजारांचा बीमोड करण्यासाठी केला जातो, असं टेड्रॉस यांनी सांगितलं.

मीडिया प्लेबॅक आपल्या डिव्हाइसवर असमर्थित आहे

हायड्रॉक्सीक्लोरोक्वीन: WHO ने कोरोना रुग्णांवर चाचणी करायला का घातली बंदी?

मात्र कोरोना रुग्णांसाठी हे औषध सुरक्षित आहे का, यासंदर्भात साशंकता व्यक्त केली जात आहे.

ट्रेडॉस यांनी लॅन्सेट या विज्ञानविषयक शोधपत्रिकेत छापून आलेल्या लेखाचा संदर्भ दिला. या अभ्यासानुसार कोरोनाचा संसर्ग झालेल्या रुग्णांना हायड्रॉक्सीक्लोरोक्वीन दिलं गेलं तर त्यांना मृत्यूचा धोका संभवतो.

हे संशोधन समोर आल्यानंतर शनिवारी जागतिक आरोग्य संघटनेनं सॉलिडरिटी ट्रायलच्या एक्झिक्युटिव्ह गटाची बैठक झाली. दहा सदस्य देशांच्या प्रतिनिधींच्या उपस्थितीत या गटाने हायड्रॉक्सीक्लोरोक्वीन औषधाच्या क्लिनिकल ट्रायलला हंगामी पातळीवर स्थगिती दिली आहे.

जगभरात या औषधासंदर्भात सुरू असणाऱ्या प्रयोगांचं विश्लेषण केलं जाईल, असं स्पष्ट करण्यात आलं.

काही दिवसांपूर्वी अमेरिकेचे राष्ट्राध्यक्ष डोनाल्ड ट्रंप यांनी कोरोनापासून बचाव करण्यासाठी हायड्रॉक्सीक्लोरोक्वीन औषध घेत असल्याचं म्हटलं होतं. त्यामुळे हे औषध चर्चेत आलं होतं.

कोरोना रुग्णांसाठी हे औषध किती परिणामकारक ठरतं हे अद्याप स्पष्ट होऊ शकलेलं नाही.

मार्च महिन्यात भारताने या औषधाच्या निर्यातीवर बंदी घातली होती. भारताने हा प्रतिबंध हटवावा आणि अमेरिकेला पुरवठा करावा असं ट्रंप यांचा आग्रह होता. ट्रंप यांच्या वक्तव्यानंतर भारताने या औषधाच्या निर्यातवरची बंदी काही प्रमाणात हटवली होती.

जागतिक आरोग्य संघटनेची आधीची भूमिका काय होती?

जागतिक आरोग्य संघटनेच्या कोव्हिड-19 बाबतच्या क्लिनिकल मॅनेजमेंट ब्लू-प्रिंटमधील माहितीनुसार, प्रयोगशाळेतील तपासणीत ‘हायड्रोक्सिक्लोरोक्वीन’चा कोव्हिड-19 विरोधात एंटी व्हायरल म्हणून फायदा होत असल्याचं आढळून आलं आहे. मात्र, चीनमध्ये कमी लक्षणं असलेल्या कोव्हिड-19 च्या तीस रुग्णांवर करण्यात आलेल्या संशोधनात या औषधाच्या वापरामुळे रुग्ण बरा होण्याच्या अवधीचा वेळ कमी झाला किंवा व्हायरस क्लिअरन्स झाल्याचं आढळून आलं नाही.

हायड्रोक्सिक्लोरोक्वीन’चा उपचार पद्धत म्हणून वापर करण्याबाबत सध्या संशोधन सुरू आहे.

भारतात वापराला सुरुवात

भारतातील संशोधन क्षेत्रात काम करणारी सर्वात मोठी संस्था ICMR म्हणजे इंडियन काउंसिल ऑफ मेडिकल रिसर्चने देशात ‘हायड्रोक्सिक्लोरोक्वीन’ औषधाच्या प्रतिबंधात्मक वापरासाठी शिफारसी जारी केल्या होत्या.

“प्रयोग शाळेत झालेल्या संशोधनातून या औषधाचा फायदा होत असल्याचं समोर आलं आहे. कोरोनाग्रस्त रुग्णांची काळजी घेणारे आरोग्य कर्मचारी आणि कोरोनाग्रस्त रुग्णांच्या संपर्कात आलेल्या लक्षणं नसलेल्या व्यक्तींना हे औषध प्रतिबंधात्मक म्हणून देण्यात यावं,” असं ICMRने आधी म्हटलं होतं.

Image copyright
Getty Images

प्रतिमा मथळा

हायड्रॉक्सीक्लोरोक्वीन

WHOच्या ताज्या निर्णयानंतर मात्र भारतीय वैद्यकीय संशोधन परिषदेचे (ICMR) महासंचालक बलराम भार्गव म्हणाले की “क्लोरोक्विन हे औषध जवळजवळ शंभर वर्षांपासून वापरात आहे, आणि हायड्रॉक्सिक्लोरोक्विन हे अधिकच सुरक्षित आहे, मलेरियासाठी सर्वत्र वापरलं जातं.

“वैद्यकीय शक्यता बघता आणि या औषधीची उपलब्धता बघून आम्ही याचा वापर सुचवला होता, पण काटेकोरपणे वैद्यकीय निरीक्षणात. अमेरिकन सरकारसुद्धा ते वापरू लागलं आणि ते अचानक लोकप्रिय झालं. त्यांनी तातडीने त्याला मान्यताही दिली आणि त्यामुळे आम्हालाही वाटलं की ते कदाचित कोरोनावर काम करेल.”

HCQचे फायदे आणि धोक्यांविषयी भारतात एम्स, ICMR आणि दिल्लीच्या तीन सार्वजनिक रुग्णालयांमध्ये तपासणी आणि अभ्यास करण्यात आले, असंही त्यांनी सांगितलं.

“यातून असं लक्षात आलं की याचे मळमळ होणे किंवा छातीत धडधडणे, याशिवाय दुसरे कोणतेही मोठे दुष्परिणाम होत नाहीय. त्यामुळे कोरोनाशी थेट लढणाऱ्या आरोग्य कर्मचाऱ्यांना तरी हे औषध घेण्यापासून रोखलं जाऊ नये. तसंच PPEचा वापर सुरू राहिला पाहिजेच,” असंही ते म्हणाले.

औषधाची मात्रा कशी असेल?

याबाबत बोलताना मुंबईतील बॉम्बे हॉस्पिटलच्या किडनीविकार विभागाचे प्रमुख डॉ. श्रीरंग बिच्चू म्हणतात, “इंडियन काउंसिल ऑफ मेडिकल रिसर्चच्या शिफारसींनुसार दिल्या जाणाऱ्या प्रतिबंधात्मक डोसचा लोकांवर फारसा विपरीत परिणाम होणारा नाही.

Image copyright
Reuters

प्रतिमा मथळा

जागतिक आरोग्य संघटनेने हायड्रॉक्सीक्लोरोक्वीनच्या क्लिनिकल ट्रायलवर बंदी आणली आहे.

“पहिल्या दिवशी 400 मिलीग्रॅम गोळी दिवसातून दोन वेळा आणि त्यानंतरच्या प्रत्येक आठवड्यात, सात आठवड्यांपर्यंत हा डोस दिवसातून एकदा लोकांना देण्यात येणार आहे. याचा एक फायदा म्हणजे भविष्यात आपल्याला या संशोधनातून उत्तर मिळू शकतं.”

‘हायड्रोक्सिक्लोरोक्वीन’ मुळे काय होईल?

ठाण्याच्या ज्युपिटर रुग्णालयाचे हृदयविकारतज्ज्ञ डॉ. विजय सुरासेंनी सांगितलं, “हायड्रोक्सिक्लोरोक्वीनच्या वापराने कोव्हिड-19 इन्फेक्शनचा वेळ आणि तीव्रता कमी होण्यास मदत होईल. ज्यामुळे रुग्ण लवकर बरा होण्यास मदत होते. या औषधामुळे आजारात निर्माण होणारी गुंतागुत आणि मृत्यूची संख्या कमी होण्याची शक्यता आहे. यामुळे न्यूमोनिया होण्याची शक्यताही कमी होण्यास मदत होईल.”

तर, डॉ. बिच्चू म्हणतात, “हायड्रोक्सिक्लोरोक्वीन’ चा कोव्हिड-19 विरोधात प्रतिबंधात्मक उपाय म्हणून फायदा झाल्याचा काहीच वैज्ञानिक पुरावा उपलब्ध नाही. पण या औषधातील मेकॅनिझमचा फायदा कोव्हिड-19 व्हायरसला शरीरातील पेशींमध्ये जाण्यापासून प्रतिबंध करण्यासाठी होऊ शकतो.”

हे वाचलंत का?

(बीबीसी मराठीचे सर्व अपडेट्स मिळवण्यासाठी तुम्ही आम्हाला फेसबुक, इन्स्टाग्राम, यूट्यूब, ट्विटर वर फॉलो करू शकता.बीबीसी विश्वरोज संध्याकाळी 7 वाजता JioTV अॅप आणि यूट्यूबवर नक्की पाहा.)



Source link

मुंबई शहरात कोरोना व्हायरसचे अर्ध्याअधिक मृत्यू या पाच वॉर्डातून #5मोठ्याबातम्या


कोरोना

Image copyright
ANI

आज विविध वृत्तपत्र आणि वेबसाईटवर प्रसिद्ध झालेल्या बातम्यांपैकी पाच मोठ्या बातम्यांचा थोडक्यात आढावा.

1. मुंबईतले अर्ध्याअधिक मृत्यूया पाच वॉर्डांमधून

कोरोना व्हायरसच्या संसर्गाचे हॉटस्पॉट ठरलेल्या मुंबईत मृत्यूंची संख्या आता एक हजाराहून अधिक आहे. मुंबई शहराच्या 24 वॉर्डांपैकी 5 वॉर्ड असे आहेत जिथे सर्वाधिक मृत्यूची नोंद होत आहे. मुंबई शहरात होणारे 50 टक्यांहून अधिक मृत्यू हे या पाच वॉर्डातले असल्याची माहिती समोर आली आहे. टाईम्स ऑफ इंडिया या वृत्तपत्रानं ही बातमी दिली आहे.

एल वॉर्ड म्हणजेच कुर्ला, साकीनाका याठिकाणी आतापर्यंत एकूण 154 कोरोना रुग्णांचा मृत्यू झाला आहे तर एकूण रुग्ण 1,667 इतके आहेत.

इ वॉर्ड म्हणजेच भायखळा, मुंबई सेंट्रल याठिकाणी आतापर्यंत एकूण 129 जणांचा कोरोना व्हायरसची लागण झाल्याने मृत्यू झालाय. तर एकूण रुग्णसंख्या 1,726 इतकी आहे.

एच ईस्ट म्हणजेच वांद्रे,सांताक्रूझ या भागात 116 जणांचा मृत्यू झाला असून 1,680 इतके रुग्ण आहेत.

एम ईस्ट म्हणजेच गोवंडी, मानखूर्द परिसरात आतापर्यंत 108 जणांचा मृत्यू झाला असून 1,140 रुग्णसंख्या आहे.

पाचवा वॉर्ड के ईस्ट म्हणजे अंधेरी पश्चिम परिसरात 103 जणांचा मृत्यू झाला असून 1,623 इतके कोरोनाचे रुग्ण आहेत.

या डेटानुसार 57 टक्यांहून अधिक मृत्यू हे या पाच वॉर्डातले आहेत. पण कोरोनाचे कोरोनाचे सर्वाधिक रुग्ण हे या पाच वॉर्डातले नसून जी नॉर्थ वॉर्डमध्ये आहेत.

या वॉर्डअंतर्गत कंटेनमेंट झोन असलेला धारावी परिसर येतो. दोन हजारहून अधिक रुग्णसंख्येची नोंद या वॉर्डात असून 85 जणांच्या मृत्यूची नोंद करण्यात आलीय.

2. चीन आक्रमक, लडाखजवळील धावपट्टीवर लढाऊ विमानं तैनात

लडाखमध्ये मे महिन्याच्या सुरुवातीला चीन आणि भारताचे सैन्य आमनेसामने आलं. लडाखमध्ये तणावपूर्ण परिस्थिती निर्माण झाली असून चीनकडून पँगाँग लेक परिसरापासून 200 किलोमीटर अंतरावर मोठ्या प्रमाणात हालचाली सुरू करण्यात आल्या आहेत. लोकमत वृत्तपत्राने ही बातमी दिली आहे.

Image copyright
Getty Images

प्रतिमा मथळा

प्रातिनिधिक छायाचित्र

या भागात विमानतळ असून तिथे चीनकडून बांधकाम सुरू असल्याची दृश्य सॅटेलाईटच्या माध्यमातून समोर आली आहेत. भारताकडूनही अतिरिक्त फौजफाटा तैनात करण्यात आलाय.

तिबेटमधल्या नगरी गुन्सा विमानतळावर चीनकडून दुसरी धावपट्टी बांधण्याचे काम वेगात सुरू असल्याचे फोटो आहेत. लढाऊ विमानांसाठी ही धावपट्टी तयार करण्यात येत आहे.

3. अर्णब गोस्वामी प्रकरणी चौकशी

दोन जणांना आत्महत्येस प्रवृत्त केल्याप्रकरणी पत्रकार अर्णब गोस्वामी यांच्याविरुद्ध अलिबाग पोलिस ठाण्यात दोन वर्षांपूर्वी गुन्हा दाखल करण्यात आला होता. मात्र पुरेसे पुरावे नसल्याने ही केस बंद करण्यात आली होती.

राज्य सरकारकडून या प्रकरणी पुन्हा एकदा चौकशीचे आदेश देण्यात आलेत. हे प्रकरण गृह विभागानं सीआयडीकडे सोपवल्याची माहिती गृह मंत्री अनिल देशमुख यांनी दिली.

इंडियन एक्सप्रेस वृत्तपत्रानं ही बातमी दिली आहे.

Image copyright
Social media

मंगळवारी देशमुख यांनी ट्वीट करून ही माहिती दिली.

“अलिबाग पोलिसांनी या प्रकरणात योग्य तपास केला नसल्याची तक्रार आज्ञा नाईक यांनी माझ्याकडे केली आहे. अर्णब गोस्वामी यांनी त्यांचे पैसे थकवल्याची त्यांची तक्रार असून यामुळेच त्यांचे वडील आणि आजीने मे 2018 मध्ये आत्महत्या केल्याचा आरोप आज्ञा यांनी केलाय. त्यामुळे आम्ही या प्रकरणाचा तपास पुन्हा सुरू करत आहोत.”

तर सर्व पैसे यापूर्वीच दिल्याचे स्पष्टीकरण रिपब्लिक टिव्हीकडून देण्यात आले आहे.

4. आरोग्य सेतू अॅप आता ओपन सोर्स,चूक शोधा लाख मिळवा

केंद्र सरकारने आरोग्य सेतू अॅप अँड्रॉईड वर्जनला आता ओपन सोर्स केले आहे. कॉन्टॅक्ट ट्रेसिंगसाठी या अॅपचा वापर होत असताना आता डेव्हलपर्स या अॅपला मॉडिफाय करू शकणार आहेत. नीती आयोगाचे प्रमुख अमिताभ कांत यांनी मंगळवारी याची घोषणा केली.

Image copyright
Play store

15 दिवासांत 5 कोटी लोकांनी हे अॅप डाऊनलोड केलं तर 40 दिवसांत ही संख्या 10 कोटीवर जाऊन पोहोचली. 3 ते 17 दिवसांत या अॅपने 3 हजार हॉटस्पॉट ओळखले आहेत अशी माहिती अमिताभ कांत यांनी दिली.

या अॅपच्या डेटा सुरक्षिततेबाबत प्रश्न उपस्थित करण्यात आले होते. या अॅपप्रकरणी आता बग बाऊंटी प्रोग्राम दिला जात आहे. म्हणजेच प्रोगॅमिंगमध्ये चूक शोधणाऱ्याला 1 लाख रुपयांपर्यंतचे बक्षीसही जाहीर करण्यात आले आहे. न्यूज 18 टेकने ही बातमी दिली आहे.

5. पोलीस हवालदाराची पोरगी IAS

सातारा जिल्ह्यातील बोरी गावातील स्नेहल धायगुडे उदयपूर जिल्ह्यात सहाय्यक जिल्हाधिकारी पदावर रूजू झाल्या आहेत. सातारा पोलीस दलात हेड कॉन्स्टेबल असणाऱ्या नानासाहेब धायगुडे यांची मुलगी स्नेहलने मिळवलेल्या यशाचे सर्वच स्तरातून कौतुक केले जात आहे. लोकमत वृत्तपत्राने ही बातमी दिली आहे.

2018 मध्ये IAS परीक्षेत स्नेहलचा 108वा नंबर होता. आता प्रशिक्षणानंतर स्नेहल उदयपूर जिल्ह्यात रूजू झाल्या आहेत. अवघ्या 22 व्या वर्षी स्नेहल आयएएस अधिकारी झाल्या. महाराष्ट्रातून सर्वात तरुण महिला अधिकारी होण्याचा मान त्यांनी मिळवला. स्नेहलची आई गृहिणी आहे, गावाकडे शेती सांभाळत तिने शिक्षण पूर्ण केले.

हेही वाचलंत का?

(बीबीसी मराठीचे सर्व अपडेट्स मिळवण्यासाठी तुम्ही आम्हाला फेसबुक, इन्स्टाग्राम, यूट्यूब, ट्विटर वर फॉलो करू शकता.बीबीसी विश्वरोज संध्याकाळी 7 वाजता JioTV अॅप आणि यूट्यूबवर नक्की पाहा.)



Source link

पाकिस्तानचं उदाहरण ऑनलाईन शिकवताना दिल्याने शिक्षिका निलंबित



इ

Image copyright
Getty Images

दोन दिवसांपूर्वी गोरखपूरमधल्या एका शिक्षिकेने चौथ्या वर्गातील विद्यार्थ्यांना ऑनलाईन क्लासदरम्यान Noun अर्थात नामाची काही उदाहरणं व्हॉट्सअॅपवर पाठवली.

जीएन पब्लिक स्कूलच्या शादाब खानम यांनी पाठवलेल्या या मेसेजमध्ये काही उदाहरणं अशी होती, जी बघून काही पालकांनी आक्षेप घेतला.

खानम यांनी पाठवलेलं उदाहरण याप्रकारचं होतं – ‘Pakistan is our dear Motherland’, ‘I will join Pakistan Army’, ‘Rashid Minhaj was a brave soldier.’

या उदाहरणांवर फक्त पालकांनीच नव्हे, तर शाळेतील प्रबंधक समितीनं चिंता व्यक्त केली. त्यानंतर पोलिसांनी याप्रकरणाची चौकशी सुरू केली आहे.

उत्तर प्रदेशचे मुख्यमंत्री योगी आदित्यनाथ यांच्या गोरखपूर जिल्ह्यातील या शिक्षिकेला निलंबित करण्यात आलं आहे.

दरम्यान, हा प्रकार चुकून घडल्याचं सांगत या प्रकरणी आपण माफी मागितली असल्याचं संबंधित शिक्षिकेनं म्हटलं आहे.

‘उदाहरणं गुगलवर सर्च करून’

शाळेचे प्रबंधक गोरक्ष प्रताप सिंह यांनी बीबीसीला सांगितलं, “या बाबीची माहिती मिळताच आम्ही शिक्षिकेला कारणे दाखवा नोटीस बजावली आहे आणि जोपर्यंत शिक्षिकेकडून उत्तर येत नाही, तोपर्यंत त्यांना वर्ग घेण्यास मनाई करण्यात आली आहे.

“या प्रकरणाच्या चौकशीसाठी आम्ही शाळेतल्या चार शिक्षकांची एक समिती बनवली आहे. तसंस याविषयी जिल्हा शिक्षण निरीक्षकांनाही माहिती दिली आहे.”

तर आपण ही उदाहरणं गुगलवर सर्च करून दिली होती, पण काही पालकांनी आक्षेप घेतल्यानंतर ग्रूपवर माफी मागितली, असं शादाब खानम यांचं म्हणणं आहे.

बीबीसीला बोलताना शादाब म्हणाल्या, “Noun, Collective Noun आणि Proper Nounची काही उदाहरणं मला एकाच ठिकाणी सापडली आणि ती कॉपी करून मी ग्रूपवर पाठवली. काही पालकांनी आक्षेप घेतला तेव्हा पाकिस्तानऐवजी इंडिया लिहा, असं मी त्यांना सांगितलं.

“पण काही जणांनी त्यावर राग व्यक्त करायला सुरुवात केली, तर मी माझ्या चुकीची कबुली देत ग्रूपवरच माफी मागितली. त्यानंतर काही पालकांनी याविषयीची माहिती सोशल मीडियावर व्हायरल केली.”

Image copyright
AFP

प्रतिमा मथळा

ऑनलाईन क्लास (प्रातिनिधिक छायाचित्र)

शाळेच्या प्रबंधक कमिटीनं नोटीस पाठवली आहे, पण अद्याप उत्तर द्यायच्या मनस्थितीत नसल्याचं शादाब सांगतात.

त्या सांगतात, “मला एका आठवड्याची मुदत देण्यात आली आहे. आता माझी मनःस्थिती नाही की, मी लगेच उत्तर देऊ शकेन. खरं तर मी माफीही मागितली आहे. एक-दोन दिवसांत मी शाळेला लेखी उत्तर पाठवून देईल.”

शाळेचे प्रबंधक जीपी सिंह सांगतात, “शादाब आमच्या शाळेत जवळपास 10 वर्षांपासून शिकवत आहेत आणि त्यांच्याविषयी कधी काही तक्रार आलेली नाही.”

स्थानिक माध्यमांत चर्चा आहे की, शाळेनं शादाब यांच्याविरोधात पोलिसांत तक्रार दाखल केली आहे. याविषयी विचारल्यावर जीपी सिंह चिडून म्हणतात, “तुमच्या प्रत्येक प्रश्नाचं उत्तर देणं माझ्यासाठी बंधनकारक नाही. तुम्ही काही गोष्टी पोलिसांनाही विचारू शकता.”

Image copyright
GAURAV TRIPATHI

प्रतिमा मथळा

जीएन पब्लिक स्कूल, गोरखपूर

गोरखपूरचे पोलीस अधीक्षकचे जनसंपर्क अधिकारी राजेंद्र मिश्र सांगतात, “शाळेनं कोणत्याही प्रकारची तक्रार दाखल केलेली नाही. पोलिसांनी माध्यमांमध्ये आलेल्या बातम्यांनुसार चौकशी सुरू केली आहे. शाळेकडूनही या प्रकरणाची चौकशी सुरू आहे.”

याप्रकरणी शाळेतील विद्यार्थ्यांचे काही पालक चिंतेत आहेत आणि त्यांनी शिक्षिकेच्या उद्देशावर चिंता व्यक्त केली आहे.

गुगलवर NOUN सर्च केल्यानंतर फक्त पाकिस्तानचे उदाहरणं समोर येत नाहीत, असं एका पालकांना नाव न छापण्याच्या अटीवर सांगितलं.

असं असलं तरी ही एक मानवी चुकी आहे, असं म्हणत अनेक जण सोशल मीडियावर शिक्षिकेचा बचाव करत आहे. याप्रकरणानं अचानक मोठं रूप धारण केल्याने अनेकांचे फोन येऊ लागल्यानं शादाब खानम कुणाशी फारसं बोलत नाहीयेत.

सोशल मीडियावरील त्यांच्या पाकिस्तान प्रेमाच्या आरोपांना त्या फेटाळून लावतात.

“आमचं संपूर्ण कुटुंब देशभक्त आहे आणि याप्रकरच्या गोष्टींचा आम्ही विचारही करू शकत नाहीत,” असं शादाब यांचे पती मोहम्मद हासिम सांगतात.

“शाळेत नुकतेच ऑनलाईन वर्ग भरायला सुरुवात झाली आहे, आणि शादाब फार तंत्रस्नेही नाही आहेत. ऑनलाईन शिकण्याचा अथवा शिकवण्याचा तिला अनुभव नाही. यामुळेच तिच्याकडून ही चूक झाली आहे,” मोहम्मद हासिम सांगतात.

हेही वाचलंत का?

(बीबीसी मराठीचे सर्व अपडेट्स मिळवण्यासाठी तुम्ही आम्हाला फेसबुक, इन्स्टाग्राम, यूट्यूब, ट्विटर वर फॉलो करू शकता.बीबीसी विश्वरोज संध्याकाळी 7 वाजता JioTV अॅप आणि यूट्यूबवर नक्की पाहा.)



Source link

आदित्य ठाकरे: महाराष्ट्रात सत्ता हातात नसल्यामुळे विरोधकांना अपचन | बीबीसी मुलाखत


आ, फ

Image copyright
Getty Images

राज्यात वाढणारा कोरोनाग्रस्तांचा आकडा, मुंबईतली कोरोनाची परिस्थिती आणि या सगळ्यातच राजकीय घडामोडींना सध्या आलेला वेग, या सगळ्याविषयी महाराष्ट्राचे पर्यटन मंत्री, मुंबईचे पालकमंत्री आणि युवासेना नेते आदित्य ठाकरे यांनी बीबीसी मराठीच्या मयांक भागवत यांच्याशी केलेली ही एक्सक्ल्युझिव्ह बातचीत.

राहुल गांधींनी म्हटलं की, सरकारमध्ये आमचं ऐकून घेतलं जात नाही. यावर देवेंद्र फडणवीसांनी असं म्हटलंय की, बहुदा काँग्रेस कोव्हिडचं सगळं खापर उद्धव ठाकरेंच्या नावावर फोडण्याचा प्रयत्न करतेय. याबद्दल तुमचं म्हणणं काय आहे?

मी राजकीय वक्तव्यांवर जाणार नाही. काँग्रेसनी जी पत्रकार परिषद घेतली, ती सगळ्यांनी पाहिली. राज्य सरकारवर सगळ्यांचा विश्वास आहे, हे स्पष्ट झालंय. मुख्यतः मी विरोधी पक्षांना सांगेन की यामध्ये राजकारण न करता आपण सगळ्यांनी एकत्र काम करणं गरजेचं आहे.

जसं देशात वातावरण आहे – कुठेही काही चुकीचं होत असेल तर आम्ही बोलत नाही, कारण विरोधी पक्ष असेल वा सत्ताधारी पक्ष असेल, आपण पक्षभेद विसरून आपण काम करणं गरजेचं आहे. लोकांची सेवा करणं गरजेचं आहे. कुठेही राजकीय मतभेद मध्ये न आणता एकमेकांची मदत करणं गरजेचं आहे.

टीका-टिप्पणी तर होतच राहील. याच्यासाठी आपल्याकडे खूप वेळ आहे. पण आता लोकांचे जीव वाचवणं महत्त्वाचं आहे.

पण राजभवनावरच्या अचानक फेऱ्या वाढणं, सरकार काम करत नाही, राष्ट्रपती राजवट लावा, असं विरोधी पक्षांनी म्हणणं. याबाबत तुम्ही काय सांगाल?

कदाचित आपलंच एक राज्य आहे, जिथे विरोधी पक्ष अशा भावनेने काम करतोय जिथे महाराष्ट्र जर खाली गेला, जगाच्या मीडियात खाली दिसला तर त्यांना बरं वाटतं. जगात असं कुठेही होत नाहीये. ही खरंतर दुःखद घटना आहे. किंवा त्यांची ही भावना चुकीची आहे.

मुख्यतः त्यामागचं एकच कारण आहे – सत्ता हातात नसल्याचं अपचन. आणि याला डायजीन किंवा जेल्युसिल हेच चालू शकतं.

मुंबईतली परिस्थिती हाताबाहेर गेलीय का?

जागतिक साथीच्या आजारादरम्यान आपल्याला आकड्याला घाबरून चालणार नाही. या आकड्यांना आपल्याला सामोरं जावं लागेल. जेव्हा एखादी साथ असते तेव्हा तुम्ही आकडे किती ओळखता, त्या रुग्णांना शोधून त्यांना आयसोलेट करता, यात सरकारचं यश असतं.

आकडे जेवढे वाढतील, तेवढे लवकर आपण पीकच्या जवळ जाऊ. तेवढ्या लोकांना आयसोलेट करू शकू आणि बरं करू शकू. कारण हा विषाणू एकामधून दुसऱ्यामध्ये प्रादुर्भाव होतो. जेवढे आकडे आपण ओळखू ते लोकांना दिसेल, पण तितक्यांना बरं करून आपण साथ आटोक्यात आणू शकू.

फील्ड हॉस्पिटल्सची गरज का पडली? BKC, नेस्को ग्राऊंड्स, वरळीच्या डोममध्ये व्यवस्था उभारण्यात येत आहेत. महाराष्ट्रातली, विशेषतः मुंबईतली पालिकेची रुग्णालयं कुठे कमी पडली की इतक्या मोठ्या प्रमाणात फील्ड हॉस्पिटल्स उभारावी लागली?

यात दोन-तीन गोष्टी पाहायला हव्यात. आपल्याकडची सगळी हॉस्पिटल्स, मग ती सरकारी असोत वा खासगी, ही सध्या कोव्हिडवर उपचार करत आहेत. देशभरातल्या इतर सर्जरीज पुढे ढकलण्यात आलेल्या आहेत. आपल्याला जर या हॉस्पिटल्समधली कोव्हिड-19 खेरीज इतर कामं आणि उपचार सुरू करायचे असतील तर मग फील्ड हॉस्पिटल्समध्ये कोव्हिडच्या साथीचे उपचार करावे लागतील. या फील्ड हॉस्पिटल्समध्ये एक्स-रे, स्वॉब्जपासून ते ऑक्सिजन आणि ICU यासाठीची आपली तयारी सुरू आहे.

Image copyright
FACEBOOK

काही ठिकाणी कोव्हिड डायलिसिसही सुरू आहे, कारण काही ठिकाणी डायलिसिससाठी गेलेली व्यक्ती कोव्हिड पॉझिटिव्ह आली आणि ती इमारत तीन दिवस बंद झाली. आणि इतरांना याचा त्रास होऊ शकतो. म्हणून आपण फील्ड हॉस्पिटल्स करतोय. म्हणजे हळुहळू इतर रोगांचे उपचार हॉस्पिटलमध्ये होतील आणि कोव्हिडवर फील्ड हॉस्पिटल्समध्ये उपचार होतील.

आपल्याकडे सध्या 30 हजारांच्या आसपास आयसोलेशन बेड्स असल्याचा दावा BMC कडून केला जातोय. ICU आणि ऑक्सिजन बेड्सची संख्याही वाढवण्यात येतेय. मग बेड्स मिळत नसल्याच्या, एका हॉस्पिटलमधून दुसरीकडे जावं लागत असल्याच्या तक्रारी लोकांकडून का येत आहेत?

काही ठिकाणी हॉस्पिटलमध्ये बेड्स रिकामे झाल्यावर लगेच भरूनही जात आहेत, कारण येणाऱ्या पेशंट्सची संख्या तेवढी आहे. दुसरी गोष्ट म्हणजे जोपर्यंत आपण एखाद्याला तपासत नाही, तो 100 टक्के कोव्हिड पॉझिटिव्ह आहे, याची खात्री होत नाही, तोपर्यंत त्याला तो बेड देणं हे त्याच्यासाठीही हानिकारक ठरू शकतं, कारण आजूबाजूचे इतर सगळेजण पॉझिटिव्ह असतात.

एखादी इतर रोग असलेली व्यक्ती निगेटिव्ह असेल, आणि तिला पॉझिटिव्ह व्यक्तींसोबत ठेवलं गेलं तर तो पॉझिटिव्ह ठरू शकतो. त्यामुळे ही थोडी तफावत आहे.

काही दिवसांपूर्वी KEM आणि सायन हॉस्पिटलमधले काही व्हीडिओ आले होते. त्यावरही राजकारण झालं होतं. रुग्णांना अशाप्रकारे का वागवलं जातंय, याविषयीचे प्रश्न उपस्थित करण्यात आले होते. मुंबईकरांना तुम्ही काय सांगाल?

आम्ही राजकारणापासून दूर राहिलो आहोत. अधिकारी, मंत्री, कार्यकर्ते या सगळ्यांनाच लोकांची सेवा करायला सांगण्यात आलेलं आहे. जिथे जिथे आम्ही कमी पडतोय, तिथे लगेच आम्ही काम करायचा प्रयत्न करतोय. जिथे राजकारण होतंय, त्याच्यापासून दूर राहातोय.

Image copyright
Getty Images

मला वाटतं, आता सगळ्यांचं काम एवढंच आहे की जिथे आपण चांगलं काही करू शकतो, ते आपण सोबत करूयात. एकमेकांना मदतीचा हात देऊयात. काही कमी पडत असेल तर नक्की दाखवून द्या. पण त्याच्यावरून राजकारण करणं अयोग्य आहे.

पण ज्याप्रकारे मृतदेहांच्या बाजूलाच रुग्णांवर उपचार केले जातायत, आपल्याकडे शवागारांची संख्या कमी असल्याने मृतदेह वॉर्डमध्ये ठेवावे लागतायत. ही परिस्थिती कशी बदलणार?

याविषयी या रुग्णालयाच्या डीनने तेव्हाही स्पष्टीकरण दिलं होतं. यामागे मेडिकल तसंच कायदेशीर कारणं असतात. काही ठिकाणी मृतदेह स्वीकारले जात नाहीयेत, तर काही ठिकाणी संपूर्ण कुटुंब असूनही अर्धा-पाऊण तास जातो. याच्याविषयी अधिक स्पष्टीकरण न देता, आपण जे योग्य करू शकतो, ते आपण करतोय.

मुंबई महापालिकेची टेस्टिंग स्ट्रॅटेजी – चाचणी करण्याची पद्धत दोन वेळा बदलण्यात आली. असं का होतंय? यात समन्वयाचा अभाव आहे का?

देशभरात जी पद्धत अवलंबण्यात येतेय त्यापेक्षा वेगळं काही आपण करू शकत नाही. ICMRच्या गाईडलाईन्स पाळण्याचा आपण प्रयत्न करतोय. केंद्र सरकार आणि राज्य सरकार यांनी एकत्र काम करणं गरजेचं आहे. आणि आतापर्यंत गृहखातं, स्वतः पंतप्रधान किंवा आरोग्य मंत्रालयाकडून मुख्यमंत्र्यांना, आरोग्यमंत्री टोपेंना ते सहकार्य मिळालेलं आहे.

दिल्लीच्या टीम्स तीन-चार वेळा येऊन गेल्या. वरळी डोम फिरल्या, वरळीला कोळीवाड्यामध्ये गेल्या, डोमला आल्या. तर साधारण हे असं सहकार्याचं वातावरण आहे.

अधिकारी ऐकत नाहीत अशी एक तक्रार होती. यामुळे प्रवीण परदेशींची बदली झाल्याचं म्हटलं गेलं. खरी परिस्थिती काय आहे ?

मला वाटतं तुम्ही गॉसिपवर भरवसा ठेवू नका.

Image copyright
Getty Images

तुम्ही एक मुंबईकर आहात. गेली जवळपास 15 वर्षं तुम्ही सामाजिक कार्यात सहभागी आहात. सगळंकाही व्यवस्थित होईल, सरकार योग्यरीतीने काम करतंय, असं आश्वासन मुंबईकरांना देणार का?

मी सगळ्यांना एकच सांगेन – प्रत्येक मुंबईकरच काय, प्रत्येक देशवासीयासाठी आम्ही इथे आहोत. सेवा करत आहोत, अहोरात्र मेहनत करत आहोत. जे काही करायची गरज आहे, जे करणं शक्य आहे, ते दोन्ही आम्ही करतोय. सेवा करतच राहू आणि या युद्धात आपण जिंकू.

(बीबीसी मराठीचे सर्व अपडेट्स मिळवण्यासाठी तुम्ही आम्हाला फेसबुक, इन्स्टाग्राम, यूट्यूब, ट्विटर वर फॉलो करू शकता.बीबीसी विश्वरोज संध्याकाळी 7 वाजता JioTV अॅप आणि यूट्यूबवर नक्की पाहा.)



Source link

उद्धव ठाकरे यांचं सरकार खरंच अस्थिर आहे का?



उद्धव ठाकरे

Image copyright
Getty Images

देशभरात कोरोनाचं संकट असताना महाराष्ट्रात राजकारण रंगलं आहे. राज्यात कोरोना रूग्णांचा आकडा 52 हजारांहून अधिक झाला आहे. त्यातले 80% रूग्ण हे मुंबई महानगर परिसरात आहेत. त्यामुळे मुख्यमंत्री उद्धव ठाकरे हे पूर्णपणे अपयशी ठरल्याची टीका विरोधकांनी सुरू केली आहे.

विरोधी पक्षनेते देवेंद्र फडणवीस यांच्यासह अनेक भाजप नेत्यांच्या राजभवनातील फेर्‍या सुरू झाल्या. राज्यपालांनी वेगवेगळ्या विषयांवर सरकारला सूचना करण्यास सुरुवात केली. राज्यपालांनी राजभवनावर सचिवांच्या बैठका घेणंही सुरू केलं आहे.

राज्यातल्या परिस्थितीबाबत राज्यपालांचा हस्तक्षेप वाढू लागलाय. मुख्यमंत्री उद्धव ठाकरेंनी राजभवनवर होणाऱ्या एका बैठकीला दांडी मारली. यामुळे सरकार आणि राजभवन यांच्यातलं शीतयुद्ध समोर येऊ लागलं. गेल्या दोन दिवसांत राजभवनवर मोठ्या हालचाली बघायला मिळाल्या.

राष्ट्रवादी काँग्रेसचे अध्यक्ष शरद पवार आणि प्रफुल्ल पटेल हे दोन नेते सोमवारी (25 मे) राजभवनावर गेले. ही सदिच्छा भेट असल्याचं राष्ट्रवादीकडून सांगण्यात आलं. त्यानंतर नारायण राणे यांनीही राज्यपालांची भेट घेतली आणि महाराष्ट्रात राष्ट्रपती राजवट लागू करण्याची मागणी केली.

रात्री उशिरा शरद पवार यांनी मातोश्रीवर जाऊन मुख्यमंत्री उध्दव ठाकरेंशी दीड तास चर्चा केली. या बैठकीमागचं गूढ नक्की काय आहे? शरद पवार आणि उद्धव ठाकरेंमध्ये मतभेद आहेत का? सत्तेची गणितं बदलू शकतात का? महाराष्ट्रात राष्ट्रपती राजवटीची मागणी का केली जातेय? हे सगळे या निमित्तानं उपस्थित व्हायला लागले. त्यातूनच हे सरकार अस्थिर झालंय का, अशी चर्चा सुरू झाली.

त्यातच २६ मे रोजी संध्याकाळी केंद्राच्या गृह खात्याच्या समितीवर असलले माढ्याचे खासदार रणजितसिंह नाईक-निंबाळकर यांनी राज्यपालांची भेट घेतली. त्यांच्याबरोबर भाजप आमदार जयकुमार गोरे सुद्धा उपस्थित होते.

त्यामुळे राजकीय चर्चांना आणखी उधाण आलं.

शरद पवार आणि उद्धव ठाकरेंमध्ये मतभेद?

कोरोनाच्या परिस्थितीत शरद पवार हे सुरवातीला लोकांशी संवाद साधून त्यांच्या प्रश्नांची उत्तरं देत होते. त्यांच्या अडचणी मंत्र्यांपर्यंत पोहचवत होते. त्यानंतर रूग्णांची संख्या जशी वाढायला लागली तसे शरद पवार बाहेर पडून मुख्यमंत्र्यांच्या काही बैठकांमध्ये दिसले.

19 मे रोजी शरद पवार यांनी मुख्यमंत्री उद्धव ठाकरे यांना वाहतूक, उद्योग, शेती, बेरोजगारी याबाबत जाहीर सूचना केल्या.

सरकारमध्ये कुठल्या गोष्टी होत नाहीत हेही त्यांनी लक्षात आणून दिलं. त्यानंतर शरद पवारांनी राजभवनवर जाण्यामागे काय कारण असू शकतं याबद्दल राज्याचे अल्पसंख्याक मंत्री आणि राष्ट्रवादी कॉंग्रेसचे नेते नवाब मलिक यांनी सांगितलं,

“शरद पवार आणि उध्दव ठाकरे यांच्यात कुठलेही मतभेद नाहीत. ते मार्गदर्शन करत असतात. राजभवनावर राज्यपालांनी शरद पवारांना बोलवलं होतं. त्यानंतर उद्धव ठाकरे आणि शरद पवार भेट ठरली. तेव्हा मुख्यमंत्री उद्धव ठाकरे हे शरद पवारांना भेटायला येणार होते. पण शरद पवार यांनी बरेच दिवस मातोश्रीवर आलो नाही म्हणून मीच येतो असं सांगितलं. त्यामुळे मतभेद या अफवा आहेत.”

राजकीय विश्लेषक अभय देशपांडे यांनी या घडामोडींबद्दल बोलताना म्हटलं, की “केंद्र सरकार आणि राज्य सरकार हे वेगवेगळ्या पक्षांचं असल्यावर राजभवन कायम सत्ताकेंद्र असतं.

अशावेळी केंद्राकडून राज्य सरकारवर राज्यपालांमार्फत हस्तक्षेप करण्याचा प्रयत्न होतो. जो सध्या महाराष्ट्रात होतोय. मुख्यमंत्र्यांना बोलवून राज्याच्या परिस्थितीचा आढावा घेणं हा राज्यपालांचा अधिकार आहे. पण सचिवांना राजभवनवर बोलवून बैठक घेणं हा हस्तक्षेप म्हणता येईल.”

विरोधकांकडून सरकार अस्थिर करण्याचा प्रयत्न केला जातोय. अशा परिस्थितीत शरद पवारांना राजभवनवर बोलवून राजकीय परिस्थितीचा अंदाज हा राज्यपालांनी घेतला असण्याची शक्यता असल्याचं अभय देशपांडे यांनी म्हटलं.

“या भेटीसाठी राज्यपालांनी शरद पवारांना राजभवनवर निमंत्रित केल्याचं राष्ट्रवादी पक्षाकडून सांगण्यात आलं. त्यानंतर शरद पवार हे मातोश्रीवर गेले. त्यांच्यामध्ये दीड तास चर्चा झाली. यावरून शरद पवार हे नाराज असल्याचं कुठे दिसत नाही. उद्धव ठाकरे आणि शरद पवार यांच्या निश्चितपणे मतभेद असतील पण सध्या ते मतभेद इतके टोकाचे दिसत नाहीत ज्यामुळे सरकार पडू शकेल.”

शिवसेना खासदार संजय राऊत यांनी याबाबत बोलताना म्हटलं, “शरद पवार आणि उद्धव ठाकरे यांचा चांगला संवाद आहे. ते सरकारला मार्गदर्शन करतायेत याचं आम्ही स्वागत करतो. सरकारच्या स्थिरतेबद्दल जर कोणी धुरळा उडवत असेल तर ती निव्वळ पोटदुखी समजावी. सरकार मजबूत आहे.”

पार्श्वभूमी तयार करण्याचा प्रयत्न?

भाजपचे खासदार नारायण राणे यांनी शरद पवार यांच्यानंतर राज्यपालांची भेट घेतली आणि त्यानंतर राज्यात राष्ट्रपती राजवट लागू करण्याची मागणी केली.

ते म्हणाले, “या सरकारची कोरोनाशी सामना करण्याची क्षमता नाही. हे सरकार राज्यात उपाययोजना करण्यात सपशेल अपयशी ठरलंय. त्यामुळे या सरकारला नारळ देऊन राज्यात राष्ट्रपती राजवट लागू करावी.”

नारायण राणे यांच्या वक्तव्यावरून शिवसेनेनेही प्रतिहल्ला केलाय. संजय राऊत याबाबत बोलताना म्हणतात, जर राष्ट्रपती राजवटी विषयी बोलायचं झालं तर आधी गुजरातची परिस्थिती पाहावी.

“केंद्र सरकार आणि राज्य सरकारचे आरोप प्रत्यारोप, मुख्यमंत्री उद्धव ठाकरे अपयशी ठरल्याची टीका करत राज्यात भाजपने घेतलेला आक्रमक पवित्रा, राजभवनवर वाढलेली वर्दळ आणि त्यातून राष्ट्रपती राजवटीची मागणी या सगळ्या घडामोडींमुळे हे सरकार लगेच पडण्याची शक्यता कमी असली तरी त्यादृष्टीने पार्श्वभूमी तयार करण्याचा विरोधक प्रयत्न करतायेत,” असं राजकीय विश्लेषक अभय देशपांडे यांना वाटतं.

“पण महाराष्ट्र आणि गुजरात यांची परिस्थितीत फार फरक नाही. त्यामुळे जोपर्यंत हे सरकार निष्क्रिय आहे हे विरोधकांना सिद्ध करता येत नाही तोपर्यंत महाविकास आघाडीचं सरकार बरखास्त होणं सोपं नाही,” असं देशपांडे पुढे सांगतात.

लोकमतचे वरिष्ठ सहायक संपादक संदीप प्रधान सांगतात, “या सरकारची स्थिरता लोकांमध्ये काय मतप्रवाह तयार होतोय यावर सर्व अवलंबून आहे. जर विरोधी पक्ष उध्दव ठाकरे सरकार अपयशी ठरलं हे जनमाणसात ठासवू शकला तर वेगळं चित्र बघायला मिळेल आणि जर ठाकरे सरकार केंद्र सरकार कशी मदत करत नाही म्हणून आम्हाला काम करणं शक्य होत नाही हे दाखवू शकलं तर हे सरकार यशस्वी ठरेल. त्यामुळे सर्व काही भविष्यात कसं चित्र उभं राहतंय यावर अवलंबून आहे.”

तर विरोधी पक्षनेते देवेंद्र फडणवीस यांनीही भाजपची भूमिका मांडली. मंगळवारी घेतलेल्या पत्रकार परिषदेत ते म्हणतात, “राणे साहेब अन्याय सहन करत नाहीत, आणि ते थेट बोलतात. पण भाजपला आता राजकारणात रस नाही. सरकार बनवण्याची आम्हाला घाई नाही. कोरोनाशी लढण्यावर आमचा फोकस आहे. आता जी चर्चा सुरू आहे, त्यामध्ये आम्ही सामील नाही. कोरोनाची लढाई इफेक्टिव्ह व्हावी, यासाठी आम्ही दबाव तयार करू.”

सरकार अस्थिर करणं अंगलट येईल?

महाविकास आघाडीचं सरकार हे अस्थिर असल्याची जरी चर्चा होत असली तरी आमचं सरकार पाच वर्षं टिकणार हे तिन्ही पक्षांकडून ठासून सांगितलं जातंय.

“भाजपचे नेते सत्तेसाठी लोभी आहेत. त्यामुळे सरकारला त्रास देण्यासाठी राष्ट्रपती राजवटीची मागणी करत आहेत. आम्ही सर्वजण मिळून कोरोना संकटात काम करतोय. त्यामुळे शंका घेण्याचं काहीच कारण नाही. हे सरकार स्थिर आहे आणि पुढेही राहील,” असं महसूल मंत्री आणि कॉंग्रेस प्रदेशाध्यक्ष बाळासाहेब थोरात यांनी म्हटलं आहे.

Image copyright
Twitter/Sanjay Raut

“कावळ्याच्या शापाने गाय मरत नाही तसं भाजपने कितीही प्रयत्न केला तरी सरकार पडणार नाही,” असं राष्ट्रवादीचे नेते आणि मंत्री नवाब मलिक यांनी म्हटलंय.

तर कोरोनाची लस आणि ठाकरे सरकार पाडण्याचा डोस विरोधकांना सापडायचाय. महाराष्ट्र अस्थिर करण्याचे प्रयत्न अंगलट येतील असा इशारा संजय राऊत यांनी दिलाय.

विरोधी पक्षनेते देवेंद्र फडणवीस यांनी मात्र सत्ता स्थापन करण्याचा प्रयत्न आम्ही करणार नसल्याचं म्हटलं.

“हे सरकार अंतर्गत वादांमुळेच पडेल. सरकारला जागं करण्याचा आमचा प्रयत्न आहे. पळवून लावण्याचा नाही,” असं फडणवीस यांनी म्हटलंय.

हेही वाचलंत का?

(बीबीसी मराठीचे सर्व अपडेट्स मिळवण्यासाठी तुम्ही आम्हाला फेसबुक, इन्स्टाग्राम, यूट्यूब, ट्विटर वर फॉलो करू शकता.बीबीसी विश्वरोज संध्याकाळी 7 वाजता JioTV अॅप आणि यूट्यूबवर नक्की पाहा.)



Source link

राहुल गांधी यांचं 'ते' वक्तव्य म्हणजे काँग्रेसची उद्धव ठाकरे सरकारमधून बाहेर पडण्याची तयारी?



राहुल गांधी

Image copyright
EPA

काँग्रेस नेते राहुल गांधी यांनी आपल्या ऑनलाईन पत्रकार परिषदेत केलेल्या एका वक्तव्यामुळे महाराष्ट्रात पुन्हा राजकीय धुरळा उडण्याची चिन्हं आहेत.

महाराष्ट्रात आम्ही सरकारमध्ये सहभागी असलो तरी महत्त्वाचे निर्णय आम्ही घेऊ शकत नाही, असं वक्तव्य राहुल गांधी यांनी केलं आहे.

महाराष्ट्रात महाविकास आघाडीचं सरकार आहे आणि देशातले एक तृतिआंश कोरोनाग्रस्त या राज्यात आहेत, याविषयी विचारलं असता राहुल गांधी म्हणाले, “मला इथे एक गोष्ट स्पष्ट करायची आहे की आम्ही महाराष्ट्रात राज्य सरकारला पाठिंबा दिला आहे. पण आम्ही महाराष्ट्रात ‘कि डिसिजन मेकर’ नाही. (महत्त्वाचे निर्णय आम्ही घेऊ शकत नाही) पंजाब, छत्तीसगड, राजस्थान आणि पाँडिचेरी या राज्यांमध्ये आम्ही डिजीसन मेकर आहोत. सरकार चालवणं आणि सरकारला पाठिंबा देणं, यात फरक आहे. असं असलं तरी महाराष्ट्राची जी कनेक्टिव्हिटी आहे त्यामुळे तिथे जास्त अडचणी येत आहेत. महाराष्ट्र देशाचं आर्थिक केंद्र आहे आणि केंद्र सरकारकडून या राज्याला पूर्ण सहकार्य मिळायला हवं.”

राहुल गांधींच्या या वक्तव्यावरून महाराष्ट्रात विरोधी पक्ष असलेल्या भाजपला आयतीच संधी मिळाली. अंतर्गत विरोधाने महाराष्ट्रातलं महाविकास आघाडी सरकार पडेल, असा दावा माजी मुख्यमंत्री आणि विरोधी पक्षनेते देवेंद्र फडणवीस यांनी केला.

फडणवीसांनीसुद्धा एक पत्रकार परिषद घेतली. यावेळी बोलताना ते म्हणाले, “राहुल गांधी आज म्हणाले की आम्ही सरकारमध्ये असलो तरी निर्णय प्रक्रियेत आम्हाला संधी नाही. आमचं या सरकारमध्ये ऐकलं जात नाही. हे विधान आश्चर्यकारक आहे.”

“याचा अर्थ स्पष्ट आहे की कोरोनाची परिस्थिती हाताबाहेर जातेय, हे लक्षात आल्यावर हे खापर शिवसेना आणि मुख्यमंत्र्यांवर फोडलं जात असल्याचा गंध यातून येतो.”

फडणवीस पुढे असंही म्हणाले, “तुम्ही सरकारमध्ये आहात. बाहेरून पाठिंबा दिलेला नाही. त्यामुळे तुम्हाला जबाबदारी झटकता येणार नाही.”

दरम्यान, बीबीसीने यासंदर्भात काँग्रेस नेते राजीव सातव यांची प्रतिक्रिया जाणून घेतली. राजीव सातव म्हणाले, “राहुल गांधी यांच्या म्हणण्याचा अर्थ असा होता की पंजाब, छत्तीसगढ, राजस्थान आणि पाँडेचेरी या चार राज्यांत आमचं पूर्ण बहुमताचं सरकार आहे. पण महाराष्ट्रात सरकारचं नेतृत्त्व काँग्रेसकडे नाही. महाराष्ट्रात काँग्रेस तिसरा ज्युनिअर पार्टनर आहे. राज्यात मुख्यमंत्री पद शिवसेनेकडे आहे. अर्थ, महसूल अशी महत्त्वाची खाती राष्ट्रवादी काँग्रेसकडे आहे. आमच्याकडे नाहीत. त्यामुळे आम्ही ज्युनिअर आहोत.”

महाराष्ट्रात आमचं नेतृत्त्व असतं तर विधान परिषद निवडणुकीत आमच्या उमेदवाराने माघार घेतली असती का, असा प्रश्नही त्यांनी विचारला.

माजी मुख्यमंत्री देवेंद्र फडणवीस यांच्या आरोपाबाबत राजीव सातव म्हणाले, “मूळ मुद्दा केंद्राकडून येणाऱ्या मदतीचा आहे. पहिलं लॉकडाऊन लागू करण्याआधी केंद्र सरकारने मुख्यमंत्र्यांशी चर्चा केली नाही. दुसरं म्हणजे पीपीई किट्स, टेस्ट किट्स, मास्क, अशा गोष्टी केंद्राने आपल्या हातात ठेवल्या.

महाराष्ट्राचा 25 हजार कोटी रुपयांचा जीएसटी अजून केंद्राने दिलेला नाही. तेव्हा केंद्राकडून जशी मदत अपेक्षित होती ती मिळाली नाही. राहुल गांधी हेदेखील म्हणाले आहेत की महाराष्ट्र महत्त्वाचं राज्य आहे. तेव्हा केंद्राच्या मदतीशिवाय राज्य पूर्ण ताकदीनिशी काम करू शकणार नाही.”

Image copyright
Getty Images

दुसरीकडे राष्ट्रवादी काँग्रेसनेही राहुल गांधी यांच्या वक्तव्याची पाठराखण करत महाविकास आघाडीत सर्वकाही आलबेल असल्याचं दाखवण्याचा प्रयत्न केला. अल्पसंख्याक मंत्री नवाब मलिक यांनी याबाबत केलेल्या ट्वीटमध्ये ते लिहितात,

“राहुल गांधी जेव्हा म्हणतात की महाराष्ट्रात काँग्रेसचं सरकार नाही तेव्हा ते खरं आहे. कारण महाराष्ट्रात महाविकास आघाडीचं सरकार आहे. त्यांच्या वक्तव्याचा विपर्यास करणं थांबवावं. तिन्ही पक्ष एकत्र आनंदात आहेत आणि महाराष्ट्राच्या जनतेची सेवा करत आहेत.”

तर राहुल गांधींची प्रतिक्रिया वास्तववादी असल्याचं राजकीय विश्लेषक हेमंत देसाई यांचं म्हणणं आहे.

बीबीसीशी बोलताना हेमंत देसाई म्हणाले, “राहुल गांधींची ही प्रतिक्रिया वास्तववादी आहे. राज्यात मोठे निर्णय होणं अपेक्षित होतं. पण ते होत नाहीयत, असं यातून राहुल गांधींना सुचवायचं असेल, असा यातून अर्थ काढता येतो.

पंजाब हे काँग्रेसशासित राज्य आहे आणि देशातल्या ज्या राज्यांनी कोरोना विषाणूच्या फैलावाला आळा घालण्यासाठी चांगले उपाय केलेले दिसतात त्यात पंजाबचाही समावेश आहे. हेच त्यांना सुचवायचं असेल, असं मला वाटतं.”

राज्यात भाजपकडून काँग्रेसला सारखं डिवचलं जात असलं तरी काँग्रेस राज्यात फारशी सक्रीय नाही, असंही हेमंत देसाई म्हणाले.

“महाराष्ट्रात काँग्रेसला किंमत नाही, असं काही भाजप नेते सतत काँग्रेसला उचकवत असतात. मात्र, आपण तिसऱ्या क्रमांकाचा पक्ष असल्याने आपण फार काही करू शकत नाही, हे काँग्रेसला माहिती आहे. पण त्याचवेळी केवळ निर्णय प्रक्रियाच नाही तर प्रत्यक्ष मैदानात उतरून काँग्रेसने जे काम करायला हवं, तेही हा पक्ष करताना दिसत नाही.

काही मोजके काँग्रेस नेते आपापल्या क्षेत्रात लोकांना मदत करत आहेत. पण अगदीच मोजके. मुंबईतसुद्धा पालकमंत्री असलम शेख वगळता इतर काँग्रेस नेते किंवा कार्यकर्ते लोकांच्या मदतीसाठी रस्त्यावर उतरताना दिसत नाहीयत. त्यामुळे तुमची ताकद कमी आहे, हे जे तुम्ही मान्य करता ते योग्य असलं तरी ती वाढवण्यासाठी तुम्ही आणि तुमचा पक्ष काय करत आहात?” असा प्रश्न हेमंत देसाई विचारतात.

Image copyright
Getty Images

2019 च्या विधानसभा निवडणुकीनंतर महाराष्ट्रात एखाद्या चित्रपटाची पटकथा वाटेल, इतक्या नाट्यमय घडामोडी घडल्या आणि महाविकास आघाडी सरकार अस्तित्वात आलं.

मात्र, त्याआधी दिल्लीत काँग्रेसमध्येही एक नाट्य घडून गेलं होतं. राहुल गांधी पक्षाचे अध्यक्ष होते. मात्र, त्यांनी स्वतःहून पक्षाध्यक्ष पदाचा त्याग केला आणि पक्षाची सूत्रं पुन्हा सोनिया गांधी यांच्या हातात आली होती.

महाराष्ट्रात जेव्हा सरकार स्थापन्याच्या घडामोडी सुरू होत्या त्यावेळी शिवसेनेसोबत सरकार स्थापन करण्यास राहुल गांधी उत्सुक नव्हते.

पत्रकार जितेंद्र दीक्षित यांनी महाराष्ट्रातल्या सत्तास्थापनेवर लिहिलेल्या ’35 डेज: हाऊ पॉलिटिक्स इन महाराष्ट्रा चेंज फॉरेव्हर इन 2019,’ या पुस्तकातही हा उल्लेख केला आहे. मात्र, सोनिया गांधी यांच्या संमतीनंतर काँग्रेसने शिवसेनेसोबत जाण्याचा निर्णय घेतला.

मात्र, कोरोना संकटानंतर राहुल गांधी पुन्हा सक्रीय झाल्याचं दिसतंय. त्यांनी फेब्रुवारीच्या दुसऱ्या आठवड्यातच मोदी सरकारने कोरोनाबाबत रणनीती आखून त्याची तातडीने अंमलबजावणी करायला हवी, असं आवाहन केलं होतं. त्यानंतर लॉकडाऊनच्या काळात त्यांनी रघुराम राजन आणि अभिजीत बॅनर्जी यासारख्या जागतिक ख्यातीच्या अर्थतज्ज्ञांशी चर्चा करून लॉकडाऊनमुळे गर्तेत गेलेली अर्थव्यवस्था पुन्हा कशी बाहेर काढता येईल, यावर चर्चा केली.

काँग्रेसने केंद्र सरकारकडे आर्थिक पॅकेजची मागणी केली. देशातील शेतकरी, मजूर आणि सूक्ष्म, लघू आणि मध्यम उद्योजकांना भरीव आर्थिक मदत करण्याचं आवाहन केलं. मजुरांच्या खात्यात दर महिन्याला साडे सात हजार रुपये रोख ट्रान्सफर करण्याची मागणीही राहुल गांधी यांनी लावून धरली.

इंटरनेटच्या माध्यमातून ते सातत्याने पत्रकार परिषदाही घत आहेत. एकप्रकारे राहुल गांधी पुन्हा एकदा काँग्रेसमध्ये क्रमांक एकचं स्थान मिळवण्याच्या दिशेने निघाल्याचं वाटतं.

याविषयी बीबीसीने ’35 डेज: हाऊ पॉलिटिक्स इन महाराष्ट्रा चेंज फॉरेव्हर इन 2019,’ हे पुस्तक लिहिणारे ज्येष्ठ पत्रकार जितेंद्र दीक्षित यांच्याशी बातचीत केली.

ते म्हणतात, “असं वाटतंय की निकटच्या भविष्यात राहुल गांधी पुन्हा एकदा पक्षाची धुरा सांभाळण्याची शक्यता आहे. पक्षाध्यक्ष पदाचा त्याग केल्यानंतर त्यांनी स्वतःला पक्षाच्या घडामोडींपासून दूर ठेवलं होतं. मात्र, गेल्या काही दिवसात त्यांनी अनेक तज्ज्ञांच्या मुलाखती घेतल्या.

लॉकडाऊनचे व्हीडियो तयार करत आहेत. प्रवासी मजुरांना भेटत आहेत. यातून असं दिसतं की लवकरच एक मोठी जबाबदारी घ्यायची त्यांची इच्छा आहे. शिवाय काँग्रेसमध्येही असे काही अंडरकरंट्स दिसत आहेत.”

दरम्यान, राहुल गांधी पक्षाध्यक्ष झाले तर महाराष्ट्राच्या सरकारवर याचे परिणाम होतील, अशी शक्यता जितेंद्र दीक्षित यांनी व्यक्त केली आहे.

बीबीसीशी बोलताना ते म्हणाले, “राहुल गांधी काँग्रेस अध्यक्ष झाले तर त्याचा महाराष्ट्राच्या सरकारवर नक्कीच परिणाम होईल. कदाचित काँग्रेस सरकारमधून बाहेरही पडू शकते. यामागचं कारण म्हणजे शिवसेनेसोबत सरकार स्थापन करण्यासाठी ते कधीच उत्सुक नव्हते.

ज्यावेळी महाराष्ट्रात सत्तास्थापन करण्याच्या हालचाली सुरू होत्या त्यावेळी महाराष्ट्रातलं जे शिष्टमंडळ दिल्लीत सोनिया गांधींची भेट घ्यायला जायचं ते राहुल गांधी यांच्या भेटीसाठीही वेळ मागायचं. मात्र, राहुल गांधी भेटायला स्पष्ट नकार द्यायचे. शिवाय, एक गोष्ट अशी की यापूर्वी त्यांनी कधीही महाराष्ट्र सरकारविषयी कुठलंही मोठं वक्तव्यं केलेलं नाही. हे स्पष्टच आहे की शिवसेनेसोबत सरकार स्थापन करण्याची त्यांची इच्छा नव्हती.”

हे वाचलंत का?

(बीबीसी मराठीचे सर्व अपडेट्स मिळवण्यासाठी तुम्ही आम्हाला फेसबुक, इन्स्टाग्राम, यूट्यूब, ट्विटर वर फॉलो करू शकता.बीबीसी विश्वरोज संध्याकाळी 7 वाजता JioTV अॅप आणि यूट्यूबवर नक्की पाहा.)



Source link

इराणमध्ये 'किस' केल्याबद्दल पार्कर खेळाडूला अटक


अलिरेझा हा इराणमधला प्रसिद्ध पार्कर खेळाडू आहे.

त्याच्या चित्तथरारक प्रात्यक्षिकांसाठी तो सोशल मीडियावर प्रसिद्ध आहे. पण अशाच एका सादरीकरणावेळी त्याने आपल्याबरोबर सहभागी असलेल्या एका मुलीला किस केलं. यानंतर तेहरान पोलिसांनी त्याला अटक केली.

हेही पाहिलंत का?



Source link

देवेंद्र फडणवीस यांचा उद्धव ठाकरे यांना चुचकारण्याचा प्रयत्न? त्यासाठी राहुल गांधींच्या ‘त्या’ वक्तव्याचा आधार?


देवेंद्र फडणवीस

Image copyright
Getty Images

महाराष्ट्र सरकारमध्ये आमच्याकडे निर्णय घेण्याचे पूर्ण अधिकार नाहीत, या राहुल गांधी यांच्या वक्तव्याचा अधार घेत देवेंद्र फडणवीस यांनी उद्धव ठाकरे यांना चुचकारण्याचा प्रयत्न केला आहे का, याची सध्या चर्चा सरू आहे.

राहुल गांधी यांनी मंगळवारी घेतलेल्या पत्रकार परिषदेमध्ये बोलताना महाराष्ट्रामध्ये आमच्याकडे निर्णय घेण्याचे पूर्ण अधिकार नाहीत, असं वक्तव्यं केलं होतं. आम्ही राजस्थान, छत्तीसगढ, पंजाब आणि पाँडेचरीमध्ये स्वतंत्रपणे निर्णय घेण्याच्या परिस्थितीमध्ये आहोत. सरकार चालवणं आणि एखाद्या सरकारला पाठिंबा देणं यामध्ये हाच फरक आहे, असं राहुल यांनी म्हटलं होतं.

देवेंद्र फडणवीस यांनी राहुल गांधींच्या या वक्तव्यावरून महाविकास आघाडीवर निशाणा साधला.

“राहुल गांधींनी म्हटलं, की आम्ही सरकारमध्ये असलो, तरी निर्णय प्रक्रियेत आम्हाला संधी नाही. आमचं या सरकारमध्ये ऐकलं जात नाही. हे विधान आश्चर्यकारक आहे. याचा अर्थ स्पष्ट आहे – कोरोनाची परिस्थिती हाताबाहेर जातेय हे लक्षात आल्यानंतर हे खापर शिवसेना आणि मुख्यमंत्र्यांवर फोडलं जात असल्याचा यातून गंध येतोय,” असं देवेंद्र यांनी म्हटलं.

तुम्ही सरकारमध्ये आहात, बाहेरून पाठिंबा दिलेला नाही. त्यामुळे जबाबदारी झटकता येणार नाही. राहुल गांधींचं वक्तव जबाबदारी झटकणारं आणि सरकारची साथ सोडणारं दिसतंय, असा टोलाही त्यांनी लगावला.

‘सरकार स्थापनेची घाई नाही’

भाजप नेते नारायण राणे यांनी सोमवारी (25 मे) राज्यपाल भगतसिंह कोश्यारींची भेट घेतली. या भेटीनंतर राणे यांनी ठाकरे सरकारला नारळ द्यावा आणि राज्यात राष्ट्रपती राजवट लागू करावी, असं विधान केलं होतं.

त्याबद्दल विचारलेल्या प्रश्नावर उत्तर देताना देवेंद्र फडणवीस यांनी म्हटलं, की भाजपला आता राजकारणात रस नाही. सरकार बनवण्याची आम्हाला घाई नाही. कोरोनाशी लढण्यावर आमचा फोकस आहे. आता जी चर्चा सुरू आहे, त्यामध्ये आम्ही सामील नाही. कोरोनाची लढाई इफेक्टिव्ह व्हावी, यासाठी आम्ही दबाव तयार करू.

“सत्ता स्थापन करण्याचा प्रयत्न आम्ही करणार नाही. हे सरकार अंतर्गत वादांमुळेच पडेल. सरकारला जागं करण्याचा आमचा प्रयत्न आहे. पळवून लावण्याचा नाही,” असंही देवेंद्र यांनी म्हटलं.

केंद्राची राज्याला जास्त मदत – फडणवीस

केंद्र सरकार महाराष्ट्राला काही देत नाही, असं वातावरण तयार करण्याचा प्रयत्न होतोय. मात्र केंद्राकडून सगळ्या राज्यांना जे मिळतं ते किंवा त्यापेक्षा जास्त महाराष्ट्राला मिळत असल्याचं विरोधी पक्षनेते देवेंद्र फडणवीस यांनी म्हटलं आहे.

देवेंद्र फडणवीस यांनी पत्रकार परिषद घेऊन केंद्राकडून महाराष्ट्राला आतापर्यंत मिळालेल्या मदतीची आकडेवारी सादर केली. त्याचबरोबर कोरोनाचा संसर्ग रोखण्याबद्दल उद्धव ठाकरे सरकार करत असलेल्या उपाययोजना आणि राज्यात सुरू असलेल्या राजकीय घडामोडींवरही त्यांनी भाष्य केलं.

महाराष्ट्रातली कोरोनाची परिस्थिती वाईट आहे. रुग्ण आणि मृत्यूसंख्या सर्वांत जास्त आहे. गेल्या महिन्याभरात मुंबईत सरासरी 3500 टेस्ट दररोज करण्यात आल्या. यापैकी 32% टेस्ट पॉझिटिव्ह येत आहेत. गेल्या 3-4 दिवसांत हे प्रमाण 40% पेक्षा जास्त असल्याचं देवेंद्र यांनी म्हटलं.

राज्य सरकार केंद्राकडून आलेले पैसे खर्च करू शकलेलं नाही. सरकारमध्ये समन्वय नाही. त्यांचं प्राधान्य वेगळ्या गोष्टींना आहे. उद्धव ठाकरेंचं मूल्यमापन मी करणार नाही. राज्याला आता assertive भूमिकेची गरज आहे. बोल्ड निर्णय घेण्याची अपेक्षा असल्याचं मत त्यांनी व्यक्त केलं.

‘सरकारनं विरोधकांना विश्वासात घेतलं नाही’

राज्य सरकारने विरोधकांना कधी विश्वासात घेतलं नसल्याचा आरोप देवेंद्र फडणवीस यांनी म्हटलं.

“दोन महिन्यांपूर्वी बैठक झाली होती, त्यानंतर बैठक झाली का? आम्ही मुख्यमंत्र्यांनाही पत्र दिलं होतं. पण आम्हाला ऑटो जनरेटेड रिप्लाय आला,” असं फडणवीस यांनी सांगितलं.

हे एकतर्फी चालल्याचा आरोप करत फडणवीस यांनी म्हटलं, की विरोधकांना विश्वासात घ्यायचं नाही आणि विरोधकांनी सल्लाही द्यायचा नाही,असं चाललंय. आपण रोज राजकारण करायचं, आणि विरोधकांना राजकारण करू नका असा सल्ला द्यायचा, हे खपत नाही.

Image copyright
Getty Images

“विरोधी पक्ष आपला कोरोनापेक्षा मोठा शत्रू असल्याचं सरकार समजतंय. विरोधी पक्षाविरुद्ध त्यांनी पेड कॅम्पेन करून घेतलं. त्यापेक्षा विरोधकांना सोबत घेतलं तर ते राज्यासाठी चांगलं होईल.”

लॉकडाऊन आवश्यक आहे, पण पूर्णवेळ राहू शकत नाही. त्यासाठीच्या एक्झिट स्ट्रॅटेजीचा विचार होताना दिसत नसल्याचं त्यांनी म्हटलं.

देवेंद्र फडणवीस यांच्या पत्रकार परिषदेतले अन्य महत्त्वाचे मुद्दे-

  • गरीब कल्याण पॅकेज – अन्नधान्य देण्याचा निर्णय – एकूण तीन महिन्यांत सरासरी 4592 कोटी रुपयांचं अन्नधान्य केंद्राने राज्याला दिलंय.
  • प्रधानमंत्री किसान सन्मान योजना 1726 कोटी, जनधन – महिलांच्या खात्यात 1308 कोटी आतापर्यंत गेले, अधिक ६५० कोटी जातील. विधवा, ज्येष्ठ नागरिक – 16 कोटी. असे 3800 कोटी रुपये थेट ट्रान्सफर केलं.
  • उज्ज्वलाद्वारे 1625 कोटी मूल्याचे सिलेंडर्स दिले.
  • आरोग्यविषयक आवश्यक बाबी खरेदी करण्यासाठी केंद्राने 2059 कोटी दिले.
  • 5648 रुपयांचा कर परतावा केंद्राने राज्याला दिला.
  • बजेट सादर करताना धरण्यात आलेल्या अपेक्षित करानुसार केंद्राने राज्याला कर परतावा दिला.
  • कापूस खरेदीसाठी 5647 कोटी, तांदूळ खरेदी 2311 कोटी, तूर खरेदी 593 कोटी,चणा-मका 125 कोटी, पीक विमा – 403 कोटी केंद्राने दिले आहेत.
  • केंद्र सरकारने जीडीपीच्या 5% कर्ज घेता येईल असा निर्णय घेतला आणि 10,69,000 कोटी रुपयांचं कर्ज घेण्याची व्यवस्था निर्माण केली. यापैकी महाराष्ट्राला 1,60,000 कोटी रुपये मिळू शकतात.
  • राज्य सरकारने बोल्ड पावलं घेण्याची आवश्यकता आहे. पैसे नाही म्हणून मदत न करण्याची भूमिका घेता येणार नाही.
  • MSME चं पॅकेज 3,70,000 कोटींचं आहे. महाराष्ट्रात50 लाख MSME रजिस्टर्ड आणि कार्यरत आहेत. या योजनेच्या अंतर्गत महाराष्ट्रातलया उद्योगांना 35 हजार कोटी रुपये मिळू शकतात.
  • 70 हजार कोटींची सबसिडी गृहनिर्माणासाठी देण्यात आलीय. रजिस्टर्ड प्रकल्पांपैकी 40% प्रकल्प महाराष्ट्रात आहेत.
  • राज्याच्या वीज वितरण कंपन्यांवर ताण येऊ नये यासाठी महावितरणला 9 हजार कोटी उपलब्ध
  • नरेगा – 1 लाख कोटी, रजिस्ट्रेशनमध्ये दीड पटींनी वाढ आहे. यापैकी 5 हजार कोटी महाराष्ट्राला मिळू शकतात.

हेही वाचलंत का?

(बीबीसी मराठीचे सर्व अपडेट्स मिळवण्यासाठी तुम्ही आम्हाला फेसबुक, इन्स्टाग्राम, यूट्यूब, ट्विटर वर फॉलो करू शकता.बीबीसी विश्वरोज संध्याकाळी 7 वाजता JioTV अॅप आणि यूट्यूबवर नक्की पाहा.)



Source link